مدونة سودانية ٢٣ مدونة سودانية ٢٣
recent

آخر الأخبار

recent
أخبار السودان
جاري التحميل ...

روايات سودانية | رواية التداخل - طارق اللبيب الحلقة 3

 

روايات سودانية | رواية التداخل - طارق اللبيب الحلقة 3

روايات سودانية | رواية التداخل - طارق اللبيب الحلقة 3


 رواية التداخل - الحلقة 3


الحاجة العجيبة في الموضوع .. انو حسن كان بفكر
في طريقة يعرف بيها الزول ده ..
او يعرف بيته .. او يعرف مكان شغله ..
عشان يسأله هو براهو ..
في اثناء تفكيره في الموضوع ابوه ..
كورك ليهو ياحسن ياحسن ..عليك تعال وصل عمك
الهادي ده لغاية بيتو ..سريع .. انا منتظرك تعال..
حسن فرح فرح شديد .. واستبشر .انو ح يعرف
الموضوع وحيسأل الراجل شخصيا ..
اها حسن قرب العربية لباب المعرض .. والراجل جا
ركب .. عمك الهادي رجل كله طيبه وبشاشة
في الخمسين تقريبا .. لا أكثر ولا أقل راجل نضيف
وراقي جدا .. وشكله زول حساس شديد ..
حتى سلامه سلام بتاع ناس فاهمين ..
الهادي قال : كيفك ياحسن ان شا الله كويس
حسن : الحمد لله ياعم الهادي لعلك بخير ..
الهادي: انت بتعرف اسمي كمان ياحسن ..؟
حسن لا والله بس هسي ابوي قال لي
تعال وصل عمك الهادي ..
الهادي : ايواااا عشان كدا ماختيت بالي ..
والله ياحسن طبعا انا صاحب ابوك من زمن
كنا في السعودية انا وهو .. ..
وبعد جينا هنا هو استقر في العاصمة ..
وانا كنت ساكن في الولايات .. بس قبل شهور جينا سكنا هنا ..
وانا بعرفك وبعرف ناس البيت .. وان شا الله بنجيكم .. زيارة قريب
أها حسن طبعا من شدة طيبة الزول البتخجل .. غلبو كلو كلو
يسأله من الشمار ..طبعا زول راقي زي ده .. بكون
صعب تخش فيهو بسؤال خاص كدا ..
لكن حسن قال انا اتعرف بيهو اول حاجة ..
وحبه حبه راح اعرف الحاصل شنو..
والونسه في الشارع مستمره عادية ..
والهادي شغال بتكلم باسلوبو الغريب.و الجميل ده .
ابوك راجل قمة في الشهامة والطيبه ..
وانا ماعندي ابدا صاحب في البلد غير ابوك ..
انا ياحسن اتخزلت في كل الناس ..
ابوك هو الوحيد الدهب المابصدي.. هو الوقف معاي في كل المحن ..
الله يحفظه ويرعاهو ويخليك ليهو ويخليهو ليك ده
وكيف امك سكينة ان شا الله كويسه ..
حسن : الحمد لله كلنا بخير الله يكرمك ياحاج ده
وحسن من جواهو يقول هسي الزول ده يخشو فيهو كيف ؟
المهم وصلو البيت ..وعمك الهادي قال ليهو اناما ح اقول ليك خش اتغدى ..
لانه ابوك راجيك ..
بس اشرب ليك كباية موية .. وسلم على ناس البيت .. واطلع ..
وطبعا هنا حسن الليلة شكلو حيعرف القصة كاملة ..
والمبكيه فعلا ..
اها دخل جوة لقى البيت فيهو تلاتة بنات صغار ..
وامهم قاعدة جوه سلم عليها .. ردت السلام وما طلعت ..
قاليهو طبعا ياحسن زوجتي ضريرة .. يعني عمياء مابتشوف
بعد شوية جات بنيه كبيرة شوية .. تسعطاشرات كدا .
سلمت عليهو بكل ادب .. واحترام غريب .. وحياء سبحان الله
والبنات الصغار جو جارين سلمو عليهو كانهم بعرفوه ..
وقعدو يتونسو معاهو بكل براءة ..
في اقل من تلاتة دقايق كباية الليمون جابتها ليهو البت الكبيرة
كانها ماخده خبر بجيتو ..
حسن جواه بفكر ياربي الراجل ده كان ببكي عشان
مرتو العمياء دي ؟؟ لالا ..
لازم في حاجة ..
يلا عمك الهادي قال لحسن طبعا ياحسن ابوك كلمني ..
انك سألتو مني ومن حكايتي معاهو ..
هسي انت مستعجل .. هسي امشي لابوك ..
وتعال لي في اي وقت احكي ليك .
حسن فرح فرح شديد خلاص بالكلام ده
ههههههه والله غايتو جنس خبار وحب استطلاع .
براهو بعدين بندم ويقول ياريتو لو ماسأل
يلا الايام بينا وح نعرف بكرة تعالو مع حسن .
زيارة خاصة لبيت الهادي ..
والهادي براهو يحكي لينا ..
الى اللقاء ..

عن الكاتب

مدونة سودانية ٢٣ مدونة سودانية ثقافية إخبارية تهتم بأخبار السودان والعالم والروايات والقصص والعبر وغيرها من المواضيع الهادفة ..

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

عن مدونة سودانية ٢٣

 سودانية ٢٣ دوت كوم هي مدونة سودانية تم تأسيسها في العام 2016 وتجاوز عدد زياراها أكثر من 16 مليون زيارة منذ تاريخ التأسيس وتهتم المدونة بأخبار السودان والعالم والقصص والعبر والروايات السودانية والثقافة والمعلومات وغيرها من المواضيع الهادفة والهامة ..

إجمالي عدد زيارات المدونة

جميع الحقوق محفوظة

مدونة سودانية ٢٣