مدونة سودانية ٢٣ مدونة سودانية ٢٣
recent

آخر الأخبار

recent
جاري التحميل ...

قصص ملهمه - ريما عبد الصادق حسن


قصص سودانيين ملهمين بالتعاون مع صفحة 
قصص ملهمه Inspiring Stories
KHARTOUM - SUDAN
الاسم : ريما عبد الصادق حسن
العمر :22 سنة وماحزيد تاني
بسم الله الرحمن الرحيم (واصبر لحكم ربك فإنك بأعيننا)♡
ساعات ربنا بيشاء وبيختار يودينا مكان وتخصص وحياة و وضع وأجواء احنا ماااعايزنها وماحابينها وحكمة ربنا فوق كل شيء ما لأنو بيكرهنا ولا لأنه عايز يعذبنا ؛لا؛
جل علاه♡
لأنه دا الخير لينا ،لأنه هنا احنا المفروض نكون ولأنو المنع عطاء ..
كون اني اكون شهادة عربية مابتدخل السودان الا اجازات والاجازة طولها شهر واجي استقر للجامعه ..
لا وكمان اكتر تخصص كارهاه صيدلة ..
واكتر جامعة بكرها .. ام درمان الاسلامية 😱
القصة بدت لمن شاء الله يشيلوني صيدلة جامعة ام درمان الإسلامية ،وفضلت السمستر الأول بتخبط في بحر ضياع ،
خايفة شديد وكمان ماعايزا انجح علشان يطلعوني وارجع لرغبتي الأم {الهندسه}..
السمستر التاني نهايتو وأيام الامتحانات تحديدا صحيت بيدي منملة{خدر}..
عادي افتكرت روحي ضغطتها والامور مااخطيرة لكن اتفاجئا بروحي نهاية اليوم مشلولة النصف الأيمن ..
النصف اللي اعتمدت في الكتابة وكل الأشغال عليه ،تفتكرو قعدتا !
مشيت وركبت المواصلات من الخرطوم للثورة بشللي وامتحنتا وكتبت بيدي الشمال والخط كان كعب شديد ..
وسافرت رجعت لأهلي يوم اخر امتحان ...فضلت مشلولة 3 شهور مافي دكتور عرف دا شنو او بالاحرى ماعايزين يتسرعو مالم يتاكدو ..
وفي التلاتة شهور كنت بلعت 10 انواع ادوية مختلفة ولا واحد قدر يزيح الشلل والالم ،
كان القرار اني اعمل رنين وعملتو ..
وتم التشخيص انو انا مصابة بالتصلب المتعدد ..
الحمدلله😊
اكيد مابتعرفو يعني شنو التصلب العصبي المتعدد ..
ماسرطان زي ما البعض ظنو
ولا مرض في القلب
دا مرض في المناعه يعني جهازي المناعي بيهاجم جهازي العصبي وبيتلف غشاء المايلين فبيخلي الخلايا العصبية مكشوفة فبتفشل في توصيل الاشارة الكهربية
فبيحصل خلل
اللي ممكن يتمثل في
شلل او
فقد للبصر او
فقد توازن او
فقد التحكم في عضلات ارادية اخرى ..او كلهم مع بعض حسب زمن التشخيص وسرعة بدء العلاج ..
اجي السودان يقولو ما تصلب ارجع السعودية تصلب ..
في الاخير الكلمة القاطعه اخدتها من الاردن وقالو دا تصلب
وجبت معاي علاجي
الافونكس لانو مامتوفر في السودان وكنت قايلة روحي البراي عندي المرض دا .. وبعدها اكتتشفت انو اعداااد كبيرة عندها نفس المرض باختلاف الهجمه والاعراض
ربنا نزل علي سكينة ورضا كدا من عندو ..
نجحت بس كنت شايلة ملحق واحد 😊
في تانية جبت امتياز للمادة الجبت فيها ملحق في سنة اولى ..
لاني ختيت كل هدفي اني اجيب فيها امتياز
قصاد المواد التانية ولو اني وحدت النية!!
لكن شاء الله واخطأت انا ..
في تالتة كنت تعبت جدا مافي شي واضح لكن الم والم والم وارهاق وحاجات كدا مابتتوصف والله ؛فحصت طلعت هجمه جديدة بدون اعراض واضحه ..
اعصاب تتدمر دون علمك !سبحان الله ..
وواااصلت ورغم عدم الاجتهاد نجحت 😊
في رابعه قررت تغيير العلاج وغيرتو لحبوب بدل حقن
واستلزم اني ابيت في المستشفى علشان النبض بيقل شديد ..
وبس ونزلت الجامعة لكن ضعيييفة جدددا اهون من ذي قبل
وبعدها بشهرين ماقدرتا اوفرها تاني لي كم سبب اولها غلاء سعرها ..
ثم لاحقا كدا اكتشفت اني المفروض اوقفها من زمان لانو شوية وكنت حدخل في مضاعفاتها الخطيرة ومنها فشل وظائف القلب ..
وربنا حمااني بمنعو لي من العلاج❤
ونجحت رغم اني كنت خاته السقوط😢
خاممممسة جااات وقربت تنتهي ورحلتي حتنتهي في الجامعه دي لكن كمية الحاجات العلمني ليها المرض لاتقدر بعدد السنين القضيتها في الجامعة ..
مبسوطة لاني قريت صيدلة وكمان صيدلة الاسلامية مبسوطة بالتغيير اللي ربنا سييرني ليه وماحقدر اعبر عن الشكر لله ابدا
مبسووطة من نفسي رغم انو اكاديمياتي قلت ولكن لاضير لزولة طاقتها الكلية 50%من طاقات البشر العاديين ..
مبسووطة لانو ربنا وضعني هنا علشان اتعلم وابقى فيلسووفة 😂
قدرتا اوصل صوتي للعالم وحعمل يوم توعوي للتثقيف بالمرض يوم الاحد في كلية الصيدلة علشان اوري الناس انو الحياة ماببتوقف على حاجه واحدة نفقدها ..
المريض ما ميت ..
مجرد انو بيمر بظرف مختلف شوية ..
المريض بيحتاج مراعاة ماشفقة ..
بتمنى البيقدر يحضر وهو اصلا داخل المدينة الجامعية يحضر وحيكون في بازار خيري وتبرعات ..
عايزا افعل هاشتاق علشان لو وصل الترند يمكن ربنا يسخر لينا ناس ونقدر ندعم دخول ادويتنا للسودان .
#التصلب_المتعدد_يحتاج_للدعم_في_السودان ..
#تعدييل:
أمس القريبة دي الدكتورة في الجامعه نادتني وأدتني فرصه أني اثقف طلاب سنة تلاتة اولاد وبنات في فقرة بتاعت عشرة دقاايق ،مبسووطة انو بديت انشر الوعي علشان لازم الناس توعى بالبيحصل 😍
#عملت اليوم التوعوي وطلع جمييل جدا وقبل أبدا لليوم التاني وقعت من تاني والمرة دي أقوى من الأولى وكانت يوم 17 ابريل والحمدلله رجعت أقوى وبديت مشروع جديد اسمو جرعة آمل ،
ودا فيه بارتين (قسمين)
القسم الاول
انو الناس تراسلني على رسايل الصفحه يدوني رقم واسم شخصيه حابين يسعدوها وانا بتصل بديها جرعة امل
ودي مجانية هدفي منها بس سرور تدخله على قلب مسلم❤
الجزء التاني
اللي هو حعمل هدايا بأفكار جديدة وحجيب الخام باذن الله من برا وحتكون اسعار رمزية لانو شايفه الهدية ما الا تكون مكلفة علشان تسعد الطرف التاني كفاية انو اتذكرك❤ ودي لسا مابديت عليها لاني خريجه وشغالة بحث تخرجي حسي 😊
عايز تبقى عالم ،مفكر؛باحث،كاتب،او اي هواية في الدنيا دي بتصل ليها رغما عن كل الصعاب ورغما عن كل الالم ..
الشغف بيولد الطموح والطموح خطوووات كبيرة في سلم النجاح 😊
بعزم واصرار وتحدي بنتخطى العقبات واحنا مانقبل نكون على هامش الحياة

أسرة مدونـة سودانيــه 23 تهـدف نحـو:
هه😊
إستقطاب كل العقول المستنيره المليئه بالأفكار الهادفه والبناءه للذات أصحاب الالهام الروحي الذي يغذي فينا الأمل والطموح ويحفزنا للنجاح نسعى جاهدين لإخراجهم من دامس الظلمات للنور لكي يرى العـــالم هذه المواهب المدفونــه ويعلـــم بأن الســـودان لايزال ملئ بأناس مبدعون ليس فقط في الفـــن والغنـــاء كما يظن البعض ولكن أيضا بكل ذخائر ومتطلبات فلسفه الحياة المتنوعه .. 
لذلك رؤيتنــا مفادها أنه يجب علينا أن ندعمهم بمشاركتنا لهم بالقليل ألا وهو أننا وبكل إعتزاز نكرس جهودنا حول توصيل أفكارهم وإنجازاتهم بكل ماتحمله من مشقه وإراده عظيمه صامده للعالم لكي يعرف العالم حقيقتهم
ولكم منا كل الحب والإحترام والتقدير

لقراءة المزيد من قصص السودانيين الملهمين
إضغط علي كلمة هنا للإنتقــال

عن الكاتب

Sudania 23

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

عداد الزوار المتواجدون الأن

عن مدونة سودانية ٢٣

مدونة سودانية ٢٣ عبارة عن مدونة إخبارية ثقافيه بمحتوى عربي تهتم بالأخبار المحلية والعالمية وأسعار صرف العملات في السودان والتقنية والمعلومات والقصص والعبر والبث المباشر للقنوات السودانية وقصص السودانيين الملهمين والكثير..

مرحباً بك أنت الزائر رقم

جميع الحقوق محفوظة

مدونة سودانية ٢٣