مدونة سودانية ٢٣ مدونة سودانية ٢٣

آخر الأخبار

جاري التحميل ...

قصص ملهمه - ليلى سراج محمد


قصص سودانيين ملهمين بالتعاون مع صفحة 
قصص ملهمه Inspiring Stories
KHARTOUM - SUDAN
السلام عليكم
انا اسمي ليلى سراج محمد.
مواليد 1996/2/9 من بورتسودان.
بقرا في جامعة الأحفاد للبنات - كلية الصيدلة.
الليلة حابة احكي ليكم عن تحدي صعب بيواجهو كل واحد مننا في حياتو وهو كيف انك تتقبل روحك!
بالأخص لو انت زول بتعاني من مرض البهاق
او المسمى بال Vitiligo.
- انا بعاني من البهاق.
ناس كتااااار بيفتكروا انو البهاق مرض معدي وانو الزول بيتولد بيهو وانو هو مرض مؤلم، احب اقول ليكم انو الكلام دا كلو غلط! السبب الرئيسي للبهاق ما اتعرف لكن اخر حاجة اتوصلو ليها العلماء انو المناعة القوية بتاعت الانسان لي اسباب غير معروفة بتقرر انها تغضي على الخلايا الصبغية يلي هي خلايا الميلانين البتدي كل واحد مننا لونو المميز البيختلف بيهو عن التانيين، البهاق بيصيب كل الاعمار والاجناس بي نسبة متساوية.
- قصتك مع البهاق بدت كيف؟
قصتي مع البهاق بدت لما كان عمري عشرة سنين. بتذكر انو اتخدشت في صباعي والخدشة لونا قلب ابيض و بدت تكبر تدريجيا وبدت تنتشر بقع تانية بيضاء بي احجام مختلفة في باقي انحاء الجسم.
- الصعوبات الواجهتك كانت شنو؟
الصعوبات الواجهتني الوقت داك كانت كتيرة شديييد ومن ضمنها انو قعدت فترة طويلة بفتش في علاج لامن البهاق كان اصلا انتشر بي نسبة كبيرة في كل انحاء جسمي وبالأخص في وشي!
اضطريت انو اقطع الدراسة واسافر برة واخلي امي واخواني واهلي لي فترة كانت غير معروفة الوقت داك، واحساس انو الواحد كان متفوق وفجأة يضطر يقطع دراستو دي حااااارة شديد والله. وبرضو انواع العلاجات الكنت باخدها كانت مؤلمة، وصلت لي درجة انو انا كنت باخد حقن اسبوعية في الشفايف على شكل تلاتة طعنات في اماكن مختلفة من الشفايف.
وبرضو الأسئلة الكانت بتتوجه لي من المجتمع بي طريقة بتجرح المشاعر، فهم انو انت قاعد في المدرسة وفجأة يجوك ناس ويقعدو يسألو فيني : " ليلى مالك؟؟ ليه بقيتي كده؟؟ انتي اتحرقتي ولا شنو؟؟" .. الوقت داك انا ذاتي ما كنت عارفة انا ليه شكلي كان عامل كده وما كان عندي اجوبة للأسئلة الكانت بتتوجه لي. الأسئلة دي ما وقفت على المدرسة بس، حتى في الشارع والدكان والمناسبات، الكبير والصغير ، كان في ناس ما بتقدر تسأل بس عيونها وطريقة نظراتها كانت كفيلة انها توصل الأسئلة.
الوقت داك حسيت انو انا زولة ناقصة، زولة مشوهه، زوله ما حلوة وما بتستحق انها تحقق اي شيء في حياتها. انعزلت عن الناس وخشيت في حالة من الاكتئاب والسلبية، مستواي الدراسي اتدهور وثقتي في نفسي اتدنت.
- طلعتي من الحالة دي كيف؟ واتقبلتي روحك كيف؟
امي وابوي لاحظو للحالة الأنا كنت فيها وبقو كل فترة بيجو يتكلمو معاي ويحاولو يفهموني انو الحاجة الحاصلة لي دي طبيعية وانو طريقة تعامل المجتمع معاي ما هي الا سوء فهم للمرض العندي ليهو .. امي قالت لي جملة غيرت حياتي و مستحيل انساها، قالت لي : " يا ليلى الإعاقة عممممرررها ما كانت في الجسد، الإعاقة في العقل! ومدام انا بقدر افكر مافي حاجة في الدنيا دي حتقدر تقيف في وشي!"
اسرتي كانت كل الدعم بالنسبة لي،
رجعت المدرسة واتأقلمت مع اسئلة الناس وبالعكس بقيت اتحمس انهم يسألوني عشان اجاوب عليهم وافهمهم الحاجة الحاصلة دي شنو❤ والحمدلله من اللحظة ديك ثقتي في نفسي رجعت لي ومستواي الدراسي اتحسن شدييييد وكنت متفوقة على الفصل من اللحظة ديك!❤
- موقف غريب حصل معاكي؟
من المواقف الغريبة الحصلت معاي كانت مقابلة مع دكتور، في فترة كده كنت ما بلتزم بالعلاج، الدكتور عشان يحفزني اخد العلاج قال لي : " ليلى انتي ما عاوزة تعرسي؟!"
- ما رديت واكتفيت بالإبتسامة.
رجعت البيت والسؤال لسه داير في بالي وانا بحاول اربط بين انو الواحدة يكون عندها "بهاق" وبين انها تعرس. احترت .. حسسني انو دا الهدف الوحيد اللازم تعيش عشانو الواحدة .. حسسني انو ماف حاجات تانية اهم ممكن تبني عليها حياتها على قدر اهمية انو الواحدة لازم تكون جميلة عشان تتزوج.
ياربي كم مرة الدكتور دا قال الجملة دي لي المرضى البيجوهو من الجنس اللطيف؟ كم بت اقنعها انها لازم تتعالج بس عشان يعرسوها؟؟ كم بت اقتنعت ورسخت في بالها فكرة الجمال المرتبطة بالعرس؟؟
الموضوع ما ليهو علاقة بالشكل او الجمال! الموضوع اكبر و اعمق من كده ونظرتي للحاجة دي ابعد من كده بي كتييير.
- طموحك شنو؟
طموحي انو اعمل دراسات عن مرض البهاق واتابع اخر الابحاث الاتعملت من ضمنها المؤتمرات العالمية البتتعمل بخصوص الأمراض الجلدية، واحاول اعرف السبب الرئيسي للمرض شنو وكيف انو انا ممكن اصل او اكتشف علاج للبهاق.
- رسالتك شنو؟
انا ما حصل كرهت مرضي ، بالعكس حبيتو، حسيت انو هو بقى جزء مني وما بقدر اتقبل روحي من غيرو ، عشرة سنين ما هينة. ما عارفة هل الحاجة دي صحيحة ولا غلط ، بس احساس انو مرضك يعلمك ويديك القوة انك تتقبل روحك زي ما انت احساس مافي اجمل منو. اتعلمت انو رأي الناس فيني ما مهم وانو انت لما تكون راضي عن روحك اي حاجة بتحلى ليك. احساس انو "دا انا" وانا عاجبني ذي ما انا.
رسالتي انو كل واحد مننا لازم يؤمن انو هو جميل ومميز بي اختلافو وانو مهما كان العيب الفيك ممكن تتأقلم معاهو وتكتشف الجوانب الإيجابية الفيهو. الواحد مننا لما ما بيحب روحو المجتمع بياخد عنو الانطباع دا والعكس صحيح، انو لو اتقبلت وحبيت روحك بتلقى كل الناس دي حاباك. انت البتقرر ياتو انطباع لازم ياخدو عنك المجتمع. حب روحك لأنها بتستاهل وانت جميل روحا وعقلا وشكلا.. وكل شيء في الدنيا دي بيحصل لي خير ولي سبب .. خليك مؤمن انو انت مميز وحلو وجميل بي اختلافك!
....................
ليلى من محبي الرسم و القراءة وكتابة القصص القصيرة وكتابة الشعر و منذ دخولها الجامعة شاركت في كل المسابقات الشعرية والنثرية باللغة الانجليزية وفازت في كليهما. حازت على شهادة في الإعلام الجديد والحاسوب وشاركت في اول مسابقة في الكيمياء العضوية برعاية جامعة الأحفاد والجامعة الامريكية في لبنان. شاركت في مسابقة الشعر باللغة الانجليزية التي اقامتها السفارة الهولندية في الخرطوم. شاركت ايضا في المعارض السنوية التي تقام في كلية الصيدلة. حازت على شهادة من منظمة TOESL للغة الانجليزية. شاركت ايضا في مؤتمر " TEDx Ahfad university" كمتحدثة، وتحدثت فيه عن رحلتها مع المرض وكيفية تأقلمها معه ونجاحها ، واوصلت فيه رسالتها التي
تتمناها ان تصل للجميع.

أسرة مدونـة سودانيــه 23 تهـدف نحـو:
هه😊
إستقطاب كل العقول المستنيره المليئه بالأفكار الهادفه والبناءه للذات أصحاب الالهام الروحي الذي يغذي فينا الأمل والطموح ويحفزنا للنجاح نسعى جاهدين لإخراجهم من دامس الظلمات للنور لكي يرى العـــالم هذه المواهب المدفونــه ويعلـــم بأن الســـودان لايزال ملئ بأناس مبدعون ليس فقط في الفـــن والغنـــاء كما يظن البعض ولكن أيضا بكل ذخائر ومتطلبات فلسفه الحياة المتنوعه .. 
لذلك رؤيتنــا مفادها أنه يجب علينا أن ندعمهم بمشاركتنا لهم بالقليل ألا وهو أننا وبكل إعتزاز نكرس جهودنا حول توصيل أفكارهم وإنجازاتهم بكل ماتحمله من مشقه وإراده عظيمه صامده للعالم لكي يعرف العالم حقيقتهم
ولكم منا كل الحب والإحترام والتقدير

لقراءة المزيد من قصص السودانيين الملهمين
إضغط علي كلمة هنا للإنتقــال

عن الكاتب

Sudania 23

التعليقات


اتصل بنا

إذا أعجبك محتوى مدونتنا نتمنى البقاء على تواصل دائم ، فقط قم بإدخال بريدك الإلكتروني للإشتراك في بريد المدونة السريع ليصلك جديد المدونة أولاً بأول ، كما يمكنك إرسال رساله بالضغط على الزر المجاور ...

تبرع لدفع تكاليف الموقع عبر الباي بال

تبرع لدفع تكاليف الموقع عبر بنك الخرطوم

مرحباً بك أنت الزائر رقم

جميع الحقوق محفوظة

مدونة سودانية ٢٣